Гаел Монфис го освои турнирот од серијата 250 во Окленд, Нов Зеланд и стана најстариот тенисер што освоил трофеј на АТП турата, која е формирана во 1990 година.
Французинот го победи Зизу Бергс од Белгија со 6-3 и 6-4 за да ја освои 13-тата титула во кариерата и прва уште од Стокхолм во 2023 година. Со 38 години, четири месеци и седум дена тој е најстариот освојувач на АТП титула во историјата и го мина рекордот на Роџер Федерер, кој беше еден месец помлад кога го освои турнирот во Базел во 2019 година.
Монфис воедно е и најстариот освојувач на титула од ова ниво по Кен Розвел, кој славел во Хонг Конг во 1977 година на 43-годишна возраст.
Утре стартува првиот сезонски грен слем турнир Австралија опен, а Монфис во првото коло за ривал го има својот сонародник Џовани Петши Перикар.