Од денеска жители на Македонија ќе може многу полесно да одат во Германија и да бараат работа на неопределено време. Новите правила на германската федерална влада, освен на работници од Македонија, овозможуваат и на жители на Србија, Босна и Херцеговина, Црна Гора, Албанија и од Косово да го користат новото правило наречено „карта-шанса“.
Германија во борба за привлекување на квалификувана работна сила од посиромашните европски држави ја зголеми односно ја дуплираше квотата за работници на неопределено време од западниот Балкан и сега таа квота изнесува 50.000 вработувања.
Втората промена е таканаречената „карта-шанса“ со која на граѓаните на Македонија и останатите држави надвор од ЕУ им се дава можност да влезат во Германија и без потврда дека веќе имаат вработување односно договор со некоја германска компанија.
Правилото се однесува на оние кои имаат најмалку две години стручна обука или факултетска диплома која е признаена во државата каде таа квалификација е стекната. За македонските граѓани тоа значи дека може да одат во Германија доколку имаат диплома и квалификација која е признаена и во Македонија, но и во Германија.
Дополнителен услов е определен степен на знаење на германски или англиски јазик. Кога „карта-шанса“ ќе му се одобри на некој работник тогаш тој има право да живее во Германија и во рок од една година да бара и да најде работа. Доколку не го исполни условот и не најде работа тогаш му завршува престојот и важењето на „карта-шансата.
Германските власти соопштија дека овие правила се воведени поради намалување на бирократијата и скратување на процедурата, а се дел од закон кој има за цел Германија да стане привлечна за квалификувани кадри кои и се потребни на најголемата европска економија.