Македонската ракометна репрезентација по двата дена пауза поради Нова Година од денеска повторно продолжи со подготовките за претстојното Европско првенство во Германија. Нашиот тим сега го очекуваат и последните две контроли пред настапот на турнирот.
Првата фаза од подготовките ракометарите ја одработија во Стара Пазова во Србија, каде одиграа и еден контролен натпревар. Ја совладавме Црна Гора во дуел што се одигра 90 минути, односно три полувремиња. Стручниот штаб предводен од селекторот Кирил Лазаров стави акцент на физичката подготовка, а сега во Скопје ќе се работи повеќе на тактички план и ќе се воигрува тимот.
Ни следуваат два натпревари со Грција, првиот е на 4.јануари во „Борис Трајковски“ во Скопје од 17 часот, кој ќе биде отворен за навивачите, додека вториот дуел со јужниот сосед е следниот ден, но тој ќе биде од затворен тип.
Македонија за Европското првенство заминува на 8.јануари, а два дена подоцна го играме првиот дуел на турнирот со Франција на стадион во Дизелдорф. Потоа тимот ќе се пресели во Берлин, каде на 14.јануари играме со домаќинот Германија, а два дена подоцна ќе се соочиме со Швајцарија на последниот натпревар од групата А на континенталниот турнир.
