Имиња, позиции, оценки за сработеното. Денеска започнуваат разговорите за реконструкција на владините редови. Коалициските партнери седнуваат на маса, согласни дека има потреба од реформи и освежување. Пред два дена на 36-годишнината на ВМРО-ДПМНЕ, лидерот на партијата и премиер Мицкоски, јасно порача дека не е задоволен од работата на дел од функционерите. Министри и директори се оддалечиле од граѓаните и станале недостапни, оцени премиерот и децидно кажа дека има нулта толеранција за неодговорност. Кој ќе остане, а кој ќе си замине од Владата, би можело да стане појасно веќе во наредните денови. Петок и сабота се резервирани за средбите на ВМРО-ДПМНЕ со Вреди и ЗНАМ.
„Со оглед на тоа што разговорите се во рана фаза и станува збор за чувствителен процес кој бара сериозен и одговорен пристап, во овој момент не би навлегувале во дополнителни детали. Штом бидат постигнати конкретни договори и дефинирани решенија, јавноста ќе биде навремено и целосно информирана.“, велат од Владата.
Основниот критериум во процесот на реконструкција останува ефикасноста, достапноста кон граѓаните, исполнувањето на програмските цели и целосната посветеност на работата во интерес на народот, потенцираат од Владата. A, од опозицијата остро до власта – велат, не е ова реконструкција туку „козметичка операција“.
„Нова козметичка операција на тендер коалицијата која веќе две години ја држи Македонија во економски и политички колапс. Наместо реконструкција која ќе значи промена, добиваме театарска претстава во која Мицкоски и неговите сателити се обидуваат да ја продолжат истата политика на долгови, сиромаштија и изолација.“, велат од СДСМ.
Детали околу кадрите ќе има штом се постигнат договорите, а засега извесно е само дека вицепремиерот за добро владеење Арбен Фетаи веќе нема да биде дел од владиниот кабинет, откако е прифатена неговата оставка.
Петар Догов