Со премиера на оперите „Сестра Анџелика“ и „Џани Скики“ од Џакомо Пучини под диригентство на Џанлука Мартиненги од Италија, на 9 мај во Националната опера и балет свечено ќе се отвори 54. издание на Мајските оперски вечери.
„Секоја од претставите на програмата носи различна емоција и заедно создаваат едно целосно искуство што посакуваме публиката да го памети. „Мајките оперски вечери“ се и огледало на институцијата, кое покажува колку сме подготвени да работиме посветено, да поставуваме стандарди и да создаваме продукција што може достоинствено да стои рамо до рамо со европските сцени“, изјави Оливер Арсовски, директор на Национална опера и балет.
Двете оперски претстави се во режија на Пјер Франческо Маестрини од Италија. Во рамки на годинашното издание на фестивалот ќе бидат изведени и оперите „Риголето“, „Тоска“, „Мадам Батерфлај“, балетот „Лебедово езеро“, „Травијата“ и „Набуко“. Фестивалскиот оган на отворањето ќе го запали првенката на Операта, Ана Дурловски.
„Внимателно избраниот репертоар, кој ги обединува безвременските дела на Верди и Пучини со нови продукциски пристапи, покажува дека традицијата и современоста може да одат рака под рака. Присуството на врвни уметници од меѓународната сцена, заедно со нашиот извонреден ансамбл, создава продукција што не е само национална, туку европска по својот квалитет“, рече Зоран Љутков, министер за култура и туризам.
