Ракометарите на Охрид се пласираа во полуфиналето на ЕХФ Купот, откако денеска пред полните трибини во салата „Билјанини Извори“ го совладаа Олимпијакос со 25-24. Охриѓани со вкупни две победи го потврдија местото меѓу четирите најдобри, по триумфот од 26-31 на првиот натпревар на гостински терен. Сега следува двомеч со словенечкиот тим Целје.
Избраниците на тренерот Борис Ројевиќ го контролираа текот на натпреварот во најголем дел од 60-те минути. Во првото полувреме имаа и највисока предност од четири голови (14-10), но гостите од Грција успеаја да намалат и на пауза да заминат со подносливи 14-12.
Во вториот дел следуваше поголема неизвесност. Охрид најчесто ја одржуваше предноста, но Олимпијакос постојано беше во чекор. Драмата кулминираше во самиот финиш, кога гостите со два брзи гола поведоа со 22-23, а потоа и со 23-24. Сепак, во клучните моменти, Ѓукиќ беше прецизен од седум метри, а Прибетиќ го комплетираше пресвртот за голема победа и пласман во полуфиналето.
Анте Иванковиќ со осум голови беше најефикасен кај Охрид, Томислав Јагуриновски додаде четири, додека голманот Кристијан Пилиповиќ блесна со 12 одбрани. Кај Олимпијакос, Савас постигна пет голови.
Во полуфиналето од третото по ранг европско клупско натпреварување, Охрид ќе игра против Целје, кое го елиминираше романски Бузау.
Првиот натпревар Охрид ќе го игра на гостински терен на 25 април, додека реваншот е закажан за 3 мај во „Билјанини Извори“.
Фото: Фејсбук/ГРК Охрид