Повик за фотографирање неправилности во кумановското централно подрачје како дел од акцијата „Да ги подберемо сви по Ред“. Иницијативата се спроведува од поранешниот кандидат за градоначалник на Куманово, Горан Стојковски – Диро, кој беше во трка со актуелниот градоначалник Максим Димитриевски.
Стојковски информира дека акцијата продолжува со зголемена поддршка од граѓаните и дека досега се заокружени и евидентирани повеќе проблематични локации во градското јадро. Според него, целта е да се испрати јасна порака дека редот, безбедноста и уреденоста во градот не се избор, туку обврска.
Од иницијативата ги повикуваат граѓаните масовно да се вклучат преку фотографирање, пријавување и споделување на неправилностите што ги забележуваат во центарот на градот. Собраните материјали, како што посочуваат, ќе бидат искористени како аргумент во понатамошните активности и како притисок за конкретни и трајни решенија.
Воедно, од тимот на Стојковски упатија извинување до граѓаните чии фотографии не се објавени на нивните канали, појаснувајќи дека поради големиот број пристигнати материјали не е можно сите да бидат јавно споделени, но секоја пријава е евидентирана во база на податоци.
Засега нема официјална реакција од кабинетот на актуелниот градоначалник во врска со оваа иницијатива.