Народната банка направи чекор, на ред се Владата со мерки да и се спротистави на инфлацијата. Ова е коментарот на дел од познавачите по објавата на статистика дека 2025 година се заврши со стапка на инфлација од 4, 1 отсто. Од бројката не се изненадени. Но, сметаат дека по промените кај благајничките записи кои ги направи НБРМ, а од кои многу зависи колку пари од банките ќе завршат во кредити и како се движи инфлацијата, сега Владата треба да се насочи кон решавање на проблемите со цените, особено кај храната во време на вакви геополитички случувања.
Монетарната политика прави се што е во нејзина моќ, сега фокусот треба да биде повеќе на Владата преку мерки за стабилизирање на макроекономските основи на државата пред се во делот на поддршка на домашните инвестиции и на извозните компании. Тука мора сериозно да се реагира особено во делот на мерките на сибам кои се неповолни и можат лошо да ја погодат домашната економија, а со тоа дополнително да се наруши домашната економска стабилност. Фокусот не е на монетарната политика, сега туку повеќе ќе биде на активностите и мерките кои ги презема Владата, изјави универзитетскиот професор Зоран Ивановски
Токму за зголемување на поддршката на домашните инвестиции, на извозниците, Ивановски смета дека ќе помогнат новите седумдневни благајнички записи, на НБРМ. Со овој продукт банките повеќе ќе пласираат кредити, наместо парите да ги чуваат кај Централната банка поради помалата камата. Но, тоа отвори прашањето дали со новиот механизам ќе се релаксира монетарната политика во услови на инфлација од 4 отсто и раст на кредитирањето на годишно ниво од скоро 13 отсто и дали тоа може дополнително да биде проблем за инфлацијата.
-Поддршката на растот е можна преку домашните инвестиции уште еден аргумент кој оди во прилог на мотивирањето на домашните инвестиции да бидат поголеми во овој период бидејќи Македонија нема друг избор освен подинамични стапки на економски раст ако сакаме на крај сите да осетиме подобар животен стандард, додава Ивановски.
Според, статистиката, за една година храната и пијалаците поскапеле за 5, 2 отсто, кај рестораните и хотелите е нешто над 7 отсто, а цените во кафеаните се зголемиле за 4, 8 проценти.
Ирена Чачкова
