Исланд повеќе не е најмалата држава чија фудбалска репрезентација се пласира на Светско првенство. Од ноќеска тоа е Курасао, мала островска земја во Карибите која има 156.115 жители и површина од само 444 километри квадратни. Претставува самоуправен дел од Холандија, а на чело на фудбалската репрезентација е славниот холандски стручњак, Дик Адвокат.
Курасао заврши на врвот во групата Б со 12 бода. Адвокат го пропушти последниот натпревар од лични причини. Влогот беше голем. Реми или победа на Курасао кај Јамајка му носеше Мундијал на неговиот тим, во спротивно Јамајка, предводена од поранешниот англиски селектор, Стив Мекларен ќе завршеше на првото место и ќе одеше на СП. Натпреварот заврши 0:0, со голема драма во финишот.
Јамајка во судиското продолжение доби пенал по стартот на Џереми Антонис врз Дужуан Ричардс во казнениот простор. Следуваше жесток протест од фудбалерите на Курасао, проверка на ВАР по што судијата од Салвадор ја поништи својата првична одлука.
Курасао ќе дебитира на Светските првенства, а ривалите во групата на турнирот во САД, Канада и Мексико догодина ќе ги дознае по ждрепката на 5 декември.
