Речиси половина милион граѓани работат на црно, а користат привилегии во здравствениот систем. Во државата, според фондот за здравство (ФЗО), има нешто над 1,8 милиони осигуреници, а фокусот се над 477.000 лица кои работат во сивата економија и оние кои живеат или приходите им се во странство. Фондот го испитува ризикот од злоупотреби на здравственото осигурување.
„Можната штета е по две основи, а тоа е дека се оштетува буџетот, бидејќи се обезбедува бесплатна здравствена заштита за луѓе кои можат да си допуштат да платат и второ дека ние имаме број на осигуреници кој не е реален. Во основа ние ги исплаќаме капитациите за матични лекари врз основа на тој број. Сами може да констатирате дека бројот на осигуреници ни е поголем од бројот на попишани жители на последниот попис“, истакна Сашо Клековски, директор на ФЗО.
Од крајот на ноември, пак, два лека против згрутчување на крвта ќе бидат достапни во аптеките, со само еден обичен рецепт. Станува збор за двата антикоагуланси Еноксапарин и Надропарин кои досега беа на болничката позитивна листа и за домашно лекување граѓаните мораа да користат рефундации.
„Граѓаните веќе не мора да се малтретираат по шалтерите на Фондот за да ги рефундираат средствата за овие листа, ќе има полесен пристап до лековите, а ние ќе имаме помал протисок за работа и ќе можеме да се концентираме на други прашања“, додаде Клековски.
По иницијатива на ФЗО, а со одлука на Владата, во работната група која ќе ја проверува злоупотребата на фондовските пари ќе учествуваат и министерствата за здравство и за финансии, Управата за јавни приходи, а по потреба ќе помага и Министерството за внатрешни работи.
Симона Петровска