Управата за финансиска полиција по насоки од Основното јавно обвинителство – Прилеп спроведе голема акција, поради сомнежи за злоупотреби со јавни набавки во вредност од околу 800.000 евра. Неофицијално, приведени се 27 лица, меѓу кои и раководни структури, а истрагата е насочена кон кривично дело – злоупотреба на службена положба и овластување. Од Обвинителството соопштуваат дека се преземаат истражни дејствија во моментов, а повеќе информации се очекуваат во следниот период. Ова е продолжение на предистражната постапка започната уште во април годинава, кога беа извршени претреси на осум локации поврзани со болницата. Директорот Кире Јоноски, именуван во 2024 година, веќе укажуваше на бројни неправилности и сомнителни трошоци – од набавка на скапи мобилни телефони, преку плаќање за услуги без договор, до трошење болнички пари за родендени и ресторански сметки. Според него, болницата била затекната во финансиски хаос со долг од над 3 милиони евра.
