Одложено е рочиштето за предметот „Талир 1“, кој се однесува на обвиненија за незаконско финансирање на партијата ВМРО-ДПМНЕ. Во кривичниот суд не стигнале списите бидејќи се наоѓаат во апелациониот суд кој одлучува по жалба на обвинетите.Тие барале судот да не ги прифати прислушуваните разговори како докази, и откако кривичниот суд го одбил барањето се жалеле на апелација.
Поради честите одолговлекувања, постои опасност делот во кој е обвинета партијата ВМРО ДПМНЕ да застари бидејќи казните за правното лице се пониски. Според обвинителката Ристоска тоа ќе се случи во декември годинава за што таа алармираше и денеска во судницата.
Во случајот се обвинети екс-премиерот Никола Груевски, како и Илија Димовски, Кирил Божиновски, Леко Ристовски и Миле Јанакиески. Предметот започна во февруари 2019 година, а поради сложеноста и бројот на сведоци, судскиот процес постојано се одолговлекува.
Обвинителката Ленче Ристоска вчера реагираше и на соопштението на ВМРО-ДПМНЕ, кое ја критикува нејзината работа и ја обвинува за политички мотивирани напади.
Таа посочи дека ваквите пораки се обид за заплашување и влијание врз нејзината работа, а од партијата побара јавно извинување во рок од седум дена, во спротивно најави тужба.