Голен број Израелците се собраа на Плоштадот на заложниците во Тел Авив синоќа за да покажат солидарност со оние што сè уште се држат во Газа, надевајќи се на нивно безбедно враќање по договорот за прекин на огнот меѓу Израел и Хамас, јави АП.
Жителка на Тел Авив, вели дека состојбата станала неподнослива.
- „Чувствувам дека едноставно повеќе не можам да дишам. Не можам да продолжам со мојот живот откако тоа се случи. Треба да се врати назад, па затоа дојдов тука денес“, рече Мајан Елијаси.
- „Навистина сакам да ги видат семејствата како ги прегрнуваат своите роднини или едноставно ги погребуваат“, рече тaa.
Се очекува 48-те израелски заложници што остануваат во Газа да бидат ослободени во наредните денови, а од Хамас се бара да го исполни рокот од 72 часа за да ги врати во Израел како дел од планот за прекин на огнот.
Израел и Хамас се согласија на прекин на огнот во Појасот Газа и ослободување на сите преостанати заложници што ги држи Хамас, клучен чекор кон завршување на разорната двегодишна војна што го дестабилизираше Блискиот Исток.
Поширокиот план за прекин на огнот вклучува многу неодговорени прашања, како што се дали и како Хамас ќе се разоружа и кој ќе управува со Газа.
Но, страните се чини се поблиску отколку што беа во последните месеци до завршување на војната во која загинаа десетици илјади Палестинци, голем дел од Газа беше срушен, завладеа глад во делови од територијата и остави десетици заложници, живи и мртви, во Газа.
Десетици илјади Палестинци продолжија да се враќаат во уништениот северен Појас Газа, откако стапи на сила прекинот на огнот постигнат со посредство на САД.
Војната, која започна со смртоносниот напад на Хамас врз Израел на 7 октомври 2023 година, предизвика и други конфликти во регионот, предизвика протести низ целиот свет и доведе до обвинувања за геноцид што Израел ги негира.
Околу 1.200 луѓе беа убиени во нападот предводен од Хамас, а 251 беа земени како заложници.
Во офанзивата на Израел што следеше, повеќе од 67.000 Палестинци беа убиени во Газа, а речиси 170.000 беа ранети, според Министерството за здравство на Газа, кое не прави разлика помеѓу цивили и борци, но вели дека околу половина од смртните случаи биле жени и деца.