МЗТ Скопје и Работнички го отвораат 4.коло во АБА2 кошаркарската лига. Двата македонски тима имаат гостувања. „Металците“ играат во Домжале, „центарци“ во Сараево.
МЗТ на првата пресметка со Хелиос Домжале во рамки на групата А загуби на домашен паркет во „Јане Сандански“ со 70-72. За нашиот тим тоа беше втор пораз на третиот натпревар, а словенечкиот состав го продолжи перфектниот ефект со три победи.
Сега момците на тренерот Васко Атанасов имаат шанса за одмазда и ова е важен натпревар во борба за 2.место во групата што води во разигрувањето. Формата на МЗТ не е на највисоко ниво, бидејќи изминатото коло го запиша и вториот пораз во домашното првенство овој пат од Чаир. Гостувањето во Домжале е добра можност со победа, МЗТ да ја врати самодовербата. Натпреварот почнува од 18 часот.
Работнички има три порази од три натпревари во групата Б, а не се очекува некоја сензација ниту денеска во Сараево. На првата меѓусебна пресметка, Босна го декласираше Работнички со 74-99, па босанскиот тим веќе може да смета и на нови бодови. Очигледно е дека приоритетот на „центарци“ сезонава е домашното првенство, а АБА2-лигата е во втор план. Овој натпревар се игра вечерва со почеток од 20 часот.