Лос Анџелес лејкерс славеа победа од 123-122 против Милвоки во најинтересниот натпревар одигран утринава во НБА-лигата.
Домашните беа без својата прва ѕвезда Леброн Џејмс, но затоа тука беше Дианџело Расел да го замени во нападот со фантастични 44 постигнати поени. Клучна беше и блокадата во последните секунди на Спенсер Динвиди против Демијан Лилард. Јанис Адетокумпо запиша трипл-дабл со 34 поени, 14 скока и 12 асистенции.
Шеи Гилгеус-Александер имаше уште еден импресивен натпревар за Оклахома, која надомести негатива од 14 поени за да слави против Мајами со 107-100. Првата ѕвезда на Тандер постигна 37 поени и останува втор стрелец во лигата сезонава.
Кливленд ја совлада Минесота со 113-104 по едно продолжение во едно од дербијата. На останатите натпревари, Филаделфија дома загуби од Њу Орлеанс со 95-103, Вашингтон беше подобар од Шарлот, а победи остварија и Њујорк, Атланта и Хјустон.