Во најинтересниот натпревар утринава во НБА-лигата, Лос Анџелес лејкерс го победија Далас со 127-110. Ентони Дејвис одигра одличен натпревар за домашниот тим со 28 поени, 12 скока и девет асистенции, а најефикасен беше Дианџело Расел со 29 поени. Леброн Џејмс имаше 25. Лука Дончиќ се врати на паркетот по три меча пауза поради повреда на скочниот зглоб и стигна до седмиот трипл-дабл сезонава и вкупно 63-тиот во кариерата со 33 поени, 13 скока и 10 асистенции.
Најдобриот тим во лигата, Бостон останува перфектен на домашен паркет со 20 победи откако утринава го совлада Сан Антонио со 117-98. Џејсон Тејтум имаше 24 поени, Џру Холидеј 22, а Џејлен Браун еден помалку. Виктор Вембањама постигна 27 поени за Спарс.
Милвоки без Јанис Адетокумпо во составот доживеа дебакл во Кливленд од 135-95. Утринава победи остварија и Минесота, Атланта, Њујорк, Торонто, Њу Орлеанс и Портланд, а дуелот помеѓу Јута и Голден Стејт беше одложен поради смртта на помошникот тренер на Вориорс, Дејан Милојевиќ.