Македонската ракометна репрезентација ја совлада Швајцарија со 29-27 во последниот натпревар од групната фаза на Европското првенство во Германија. Нашиот тим со овој триумф го освои третото место во групата А, но нема да мине во следната главна фаза. За Македонија ова беше прва победа на Европските првенства по серија од седум порази по ред или по пауза од четири години.
Избраниците на селекторот Кирил Лазаров по двата убедливи порази против фаворитите Франција и Германија, денеска против Швајцарија покажа поинаков карактер и подобра игра. Особено треба да се истакне првото полувреме во кое имавме блескави моменти. Водевме со највисоки +5 по една серија од 6-0, а на полувремето беше 13-9 за нашиот тим.
Македонија имаше водство се до последните минути од средбата, кога Швајцарците силно притиснаа. Противникот дури и го презеде водството со 24-25 на нешто повеќе од пет минути до крајот. Нашите момците покажаа карактер во финишот кога го решија натпреварот во својата корист со серија од 3-0 за конечни 29-27.
Марко Митев со перфектен ефект од 5 гола од исто толку удари ја водеше Македонија во нападот, а пет голови постигна и Ненад Костески. Жарко Пешевски и Филип Кузмановски постигнаа по четири погодоци, а по три имаа Филип Талески и Томислав Јагуриновски. Мартин Томовски на голот имаше 12 одбрани во отстуство на капитенот Никола Митревски, кој го пропушти натпреварот поради повреда. Ветеранот Енди Шмид постигна 12 голови за Швајцарија.
Денешната победа против Швајцарија е важна за Македонија, бидејќи ќе биде носител во ждрепката за баражот за пласман на следното Светско првенство.