Македонската ракометна репрезентација денеска со дуелот против Франција од 18 часот го отвора Европското првенство во Германија. Овој натпревар веројатно ќе остане запишан во историјата на ракометот, бидејќи се очекува да биде срушен рекордот по број на навивачи. Пресметката се игра на фудбалскиот стадион „Меркур-Шпила арена“ во Диселдорф, кој е адаптиран за ракометен натпревар и собира преку 50.000 гледачи.
Македонија пред себе денеска има огромен предизвик што се вика Франција. Олстар тимот на „триколорите“ е застрашувачки и секако еден од кандидатите за златниот медал на ова Европско првенство. Улогата на аутсајдер не треба да значи дека нашата репрезентација предвреме е отпишана туку дека треба да одигра без притисок, да биде мотивирана, да го покаже најдоброто и да сонува сензација.
Селекторот Кирил Лазаров упати предупредување до ривалите на вчерашната средба со новинарите, дека Македонија може да казни ако биде потценета. Во овој ростер има искусни ракометари со неколку големи натпреварувања зад себе, но и млади играчи кои полека се наметнуваат како идни лидери и ја чекаат својата шанса да блеснат на најголемата сцена.
Македонија на последните две Европски првенства има само една победа и тоа во 2020 година против Украина, а на претходниот турнир во Унгарија и Словачка имавме три порази во групата од Словенија, Црна Гора и Данска.
На овој континентален собир ќе биде исклучително тешко да се победи со оглед дека во групата А освен Франција, за ривали ги имаме Германија и Швајцарија. Можеби нашата најголема шанса за позитивен резултат е Швајцарија во последното коло, но и тоа е тим, кој во последните години сериозно напредува и е составен од играчи кои играат во најсилната светска лига, Бундеслигата.
По денешниот натпревар со Франција, нашиот тим потоа се сели во Берлин, каде ќе ги играме следните два натпревари. На 14.јануари против Германија, а два дена подоцна и со Швајцарија. За потсетување, во главната фаза на турнирот пласман ќе обезбедат само првите две репрезентации од групата.