Бразилската фудбалска легенда Марио Загало, кој освои четири титули светски првак со „кариоките“ починал на 92-годишна возраст.
Загало е единствениот човек во историјата на фудбалот што бил дел од четири титули светски првак. Тој беше првотимец на репрезентацијата, кога оваа јужнамериканска земја ги освои титулите на Мундијалите во 1958 и 1962 година. Потоа беше селектор на Бразил при освојувањето на титулата во 1970 година со генерација предводена од играчи како Пеле, Жарзињо и Карлос Алберто.
Загало потоа беше дел од стручниот штаб во 1994 година на СП во САД, кога Бразил ја освои титулата, тој беше помошник на селекторот Карлос Алберто Пареира. Во 1998 година повторно беше селектор и ги одведе „кариоките“ до финалето, но го загубија мечот за титулата од Франција со 3-0 во Париз.
Тој беше првиот човек во историјата на фудбалот што го имаше освоено Светското првенство како играч и како селектор, достигнување што подоцна го повторија и Франц Бекенбауер и Дидие Дешамп.