Договорите на дело ќе бидат минато за 1.117 лица во јавното здравство низ Македонија. Нивниот работен однос, со одлука на Влада, од определено време ќе се трансферираа во неопределно, трајно, со што се решава нивниот статус кој со години беше проблем. Меѓу нив има лекари, болничари, техничари, медицински и немедицински кадар. Ова го најавија министерот за здравство Фатмир Меџити на заедничка прес-конференција со премиерот Димитар Ковачевски и министерот за финансии, Фатмир Бесими.
„Здравството, заедно со образованието и социјалната заштита се главните три компоненти за зајакнување на човечкиот капитал и сметам дека со оваа одлука по неколку напорни средби на повеќе институции успеавме заеднички да дојдеме до одлука што создава и ја задржува супстанцата на човечкиот капитал на здравствен и технички персонал со кој ќе може да ја изведат својата хумана функција кон граѓаните и граѓаните да добијат квалитетно здравство, имајќи го предвид трендот на демографските движења, особено на здравствените работници“, изјави Меџити.
Министерот за здравство, Фатмир Меџити најави и продолжување на инвестициите во здравството.
„Изминатиов период иако во време на криза, инвестициите во здравството се големи. Инвестираме не само во опрема и инфраструктура, инвестираме и во кадар, зголемување на платите, додатоците на здравствените работници. Со ваквите сериозни инвестиции во јавното здравје, помагаме да се зголеми квалитетот на услугата, да се олесни пристапот до здравствените услуги и се стремиме на нашите пациенти да им овозможиме европско здравство“, рече министерот Меџити.
