Никола Јокиќ одигра перфектен натпревар за Денвер во победата од 142-105 против Мемфис во НБА-лигата. Српскиот центар запиша трипл-дабл со 26 поени, 14 скока и 10 асистенции и немаше ниту едно промашување од игра ниту пак од линијата за слободни фрлања. За него тоа беше 116-тиот трипл-дабл во регуларна сезона во НБА кариерата и сега е на четвртото место на вечната листа зад Меџик Џонсон, Оскар Робертсон и Расел Вестбрук.
Детроит постави нов негативен рекорд во НБА-лигата откако утринава го запиша 28.пораз во низа. Пистонс утринава загубија на гостувањето кај Бостон со 128-122 во продолжението и сега ја имаат најдолгата серија порази во една сезона во историјата. Кристапс Порцингис со 35 поени ги предводеше Селтикс, а Џејсон Тејтум имаше 31. Кај Пистонс, најефикасен беше Кејд Канингем со 31 поен.
Лос Анџелес лејкерс со 133-112 славеа против Шарлот. Ентони Едвардс постигна 44 поени во победата на Минесота од 118-110 против Далас, кој беше без Лука Дончиќ. Тајрис Халибартон имаше историска вечер за Индијана во победата од 120-104 на гости кај Чикаго. Кошаркарот на Пејсерс постигна 21 поен, а подели и 20 асистенции, но интересно немаше ниту една загубена топка.
Победи остварија и Њу Орлеанс против Јута, Мајами како гостин славеше кај Голден Стејт, а Сан Антонио исто така дојде до гостинска победа кај Портланд.