Фудбалската федерација на Македонија на денешната седница на Управниот одбор донесе одлука за започнување на процесот за воведување ВАР-технологија во домашното првенство. Засега не е јасно точно кога ќе има видео-технологија во Првата лига, но најреално е да се очекува на стартот на идната сезона 2024/2025.
Куќата на фудбалот пред извесно време најави дека ќе воведе ВАР-технологија во домашното фудбалско првенство, а од денеска и официјално почнува процесот и подготовката за остварување на целта. За целосна имплементација на технологијата потребно е време, бидејќи прво и основно судиите треба да минат низ процес на едукација за користење на ВАР. Тука секако е и набавката на техничката опрема и финансирањето на проектот, а еден од главните проблеми може да биде лошата инфраструктура на македонските стадиони.
Потребна е квалитетна продукција за пренесување на натпреварите во живо, што секако е тесно поврзано и со ВАР-технологијата.
„Објективно, потребно е најмалку шест месеци за системот да се постави и да биде подготвен за употреба, пред се поради неопходната и пропишана обука што мора да ја поминат судиите и операторите, но ќе се обидеме да го скратиме тој период што е можно повеќе“, изјави претседателот на ФФМ, Муамед Сејдини.
Оваа сезона речиси сите прволигаши и добар дел од второлигашите имаа сериозни забелешки на судењето. Редовно по секое коло се објавуваа соопштенија и видеа од судиските грешки, нешто што дури и ФФМ јавно го призна. ВАР-технологијата е неопходна за да се задржи регуларноста и интегритетот на фудбалот.
Управниот одбор денеска ја подржа и иницијативата на клубовите да се формира Здружение на прволигаши.