На унгарската берза ХУПЕКС, може да се види дека денеска во пикот цената е речиси 6 евра за мегават час. Според, познавачите вакви ниски суми може да се очекуваат до Нова Година, па потоа да има раст.
-Во католичкиот свет до Нова Година, традиционално не работи буквално ништо во индустријата. Понудата е голема, а побарувачката мала и затоа цените се такви какви што се на берзата. Ова е вообичаено за овој период од годината кога во католичките земји се прославува најголемиот христијански празник, што може да се види од историските податоци. По Нова Година очекувам дека цената постепено ќе порасне и ќе дојде до оние максимуми кои ги имавме во изминатите месеци, вели за Телма директорот на македонската берза на електрична енергија МЕМО, Симон Шутиновски.
Просечната цена пак за месец декември според ХУПЕКС е околу 92 евра за мегават час и таа е меѓу пониските за годинава.