Новак Ѓоковиќ го освои мастерс тенискиот турнир во Париз откако во големото финале денеска го совлада Григор Димитров. Србинот со оваа победа повторно испиша нова историја во тенисот.
Се чини дека Ѓоковиќ имаше повеќе проблеми да победи во претходните рунди отколку денеска во финалето, кое го реши во своја корист за 98 минути игра со 6-4 и 6-3. Бугаринот, кој го играше само своето второ мастерс финале во кариерата не претставуваше пресериозен проблем за Србинот.
Ѓоковиќ стана првиот тенисер во историјата со 40 мастерс титули, а воедно ја освои и рекордната седма титула во Париз.
Светскиот тенисер број 1 во АТП финалето или завршниот сезонски мастерс во Торино влегува со низа од 18 победи по ред, што датира уште од Вимблдон.
Ѓоковиќ најверојатно осми пат во кариерата ќе ја заврши годината на првото место на АТП-листата, бидејќи има 1.490 поени предност пред Карлос Алкараз. Шпанецот математички може да го престигне Ѓоковиќ, но Србинот треба да ги загуби сите три натпревари во својата група на АТП финалето, а Шпанецот да ги добие сите пет меча.
Завршниот мастерс турнир почнува на 12 ноември.