Новак Ѓоковиќ синоќа го совлада Данил Медведев во три сета во големото финале на Ју-Ес Опен и дојде до 24-тата грен слем титула во кариерата. Србинот се израмни со Маргарет Корт, а му побегна на Рафаел Надал за две големи титули.
По поразот од Карлос Алкараз во финалето на Вимблдон, Ѓоковиќ се врати со серија од 12-0, која траеше од мастерсот во Синсинати и продолжи на Ју-Ес Опен. Медведев кој го победи Србинот во Њујорк во финалето во 2021 година, синоќа немаше сили повторно да го запре. Ѓоковиќ славеше со 6-3, 7-6, 6-3 и по четврти пат во една сезона дојде до три грен слемови, по 2011, 2015 и 2021 година.
По триумфот Ѓоковиќ симболично ја посвети титулата на трагично загинатата кошаркарска легенда Коби Брајант.
„Мислев, бидејќи тој го носеше бројот 24 кога стана легенда на Лејкерс и светската кошарка. Па затоа мислев дека би било убаво, симболично да му оддадам признание“, рече Ѓоковиќ. „Коби ми беше близок пријател. Зборувавме многу за победничкиот менталитет, кога се мачев со повреди и се обидував да направам кам-бек, да се вратам назад на врвот. Тој беше еден од луѓето на кои најмногу се потпирав. Секогаш беше тука за било каков совет или било каква подршка на најпријателски начин“, додаде Србинот.
Novak hits 24 and pays tribute to the late Kobe Bryant 💙 pic.twitter.com/rDXVUvYe1Z
— US Open Tennis (@usopen) September 10, 2023
Најуспешниот тенисер на сите времиња од денеска се враќа и на првото место на АТП ранг-листата.