Јаник Синер го совлада првиот носител Карлос Алкараз и закажа финале против Данил Медведев на мастерс тенискиот турнир во Мајами. Поразот на Шпанецот значи дека Новак Ѓоковиќ од понеделник се враќа на првото место на АТП листата.
Синер и Алакараз одиграа возбудливо полуфинале утринава на кое славеше Италијанецот и тоа со пресврт. Шпанецот го доби првиот сет во тај-брејкот со 6-7, но Синер се врати со 6-4 и 6-2 во следните два сета за да се одмазди за поразот во полуфиналето на Индијан Велс пред две недели. Поразот на Алкараз значи дека младиот Шпанец од понеделник ќе го загуби првото место на АТП-листата, каде кам-бек ќе направи Новак Ѓоковиќ, кој ги пропушти двата мастерси во САД откако не доби дозвола за влез во земјата, бидејќи не е вакциниран против Ковид-19.
Синер во големото финале утре ќе се соочи со Данил Медведев, кој пак во рускиот дуел го совлада Карен Хачанов во три сета со 7-6, 3-6 и 6-3. Интересно е тоа што Италијанецот во меѓусебните дуели со Русинот нема победа во сите пет пресметки досега.
Вечерва во 21 часот се игра финалето во женска конкуренција во Мајами во кое ќе се соочат Елена Рибакина и Петра Квитова.