На мастерс тенискиот турнир во Мајами, Данил Медведев без проблеми стигна до 3.коло откако фуриозно го совлада Роберто Карбаљес Баена.
Рускиот тенисер се врати на победничките патеки по поразот во финалето на Индијан Велс, но синоќа немаше многу мака со Шпанецот на кој му препушти вкупно три гема, односно славеше со 6-1 и 6-2. Во следната трета рунда, Медведев ќе игра со Алекс Молчан, кој во три сета го победи Јошихито Нишиока. Стефанос Циципас не одигра со Ришар Гаске, кој се повлече од настапот, па Гркот без мака оди во следната рунда, каде ќе игра со Кристијан Гарин.
Шестиот носител Феликс Оже Алиасим одигра два сета во тај-брејкот, но го скрши отпорот на Тијаго Монтеиро. Во следната рунда се и Карен Хачанов и Франсес Тијафо.
Утринава неколку високо пласирани тенисери испаднаа во Мајами, а тоа се Камерон Нори, Матео Беретини, Алекс де Минор и Даниел Еванс.
Кај тенисерките веќе се игра третото коло. Елена Рибакина спаси меч топка и ја продолжи низата победи на десет меча откако ја совлада Паола Бадоса со 3-6, 7-5 и 6-3. Во следното коло тенисерката од Казахстан ќе игра со Елис Мертенс. Анастасија Потапова ја изненади домашната фаворитка и шеста носителка на турнирот, Кого Гоф со 6-7, 7-5 и 6-2.
Магда Линете ја победи Викторија Азаренка во три сета, а пласман понатаму обезбедија и Јелена Остапенко и Џесика Пегула.