Серхио Перез од Ред Бул ќе стартува од пол-позицијата за утрешната трка за Големата награда на Саудиска Арабија во рамки на Формула 1 шампионатот. Актуелниот светски шампион Макс Ферстапен поради проблеми со болидот не постави време во втората квалификациска сесија.
Мексиканецот втора година по ред е на пол-позицијата во Џеда откако денеска имаше најбрзо време во третата квалификациска сесија од 1:28,265 минути. Шарл Леклер беше втор, но возачот на Ферари утре на стартот ќе биде на 12-тата позиција поради казната и промената на електрични компоненти во неговиот болид.
Трето време денеска имаше Фернандо Алонсо, а зад него ќе стартува Џорџ Расел. Најдобрите 10 ги комплетираат Карлос Сајнц, Ленс Строл, Естебан Окон, Луис Хамилтон, Оскар Пиастри и Пјер Гасли.
Актуелниот шампион Макс Ферстапен имаше механички проблем со болидот во втората квалификациска сесија па не успеа да постави време и утре ќе стартува од 15.место.
