Новак Ѓоковиќ по вчерашниот триумф на Австралија опен од денеска и официјално повторно е најдобар светски тенисер на АТП ранг-листата.
Со освојувањето на својот 22-ри грен слем трофеј, српскиот тенисер заработи 2.000 АТП поени доволно за да направи скок од четири места и да го врати приматот рекет број 1. Ѓоковиќ сега има 7.070 поени и го турна на второто место Карлос Алкараз, кој не играше во Мелбурн поради повреда. Финалистот од Австралија опен, Стефанос Циципас се искачи една позиција и сега е трет, потоа следуваат Каспер Руд и Андреј Рубљов. Рафаел Надал падна четири позиција и сега е шести, а најдобрите 10 светски тенисери ги комплетираат Феликс Оже Алиасим, Тејлор Фриц, Холгер Руне и Хуберт Хуркач. Интересно е тоа што Данил Медведев испадна од ТОП 10 и сега се наоѓа на 12.место.
Кај тенисерките, Ига Швјонтек и покрај слабиот настап на Австралија опен останува на првото место на ВТА-листата 44-та недела по ред. Шампионката Арина Сабаленка се искачи три позиции и сега е втора пред Онс Жабер, Џесика Пегула и Каролин Гарсија. Коко Гоф е шеста, а потоа следуваат Марија Сакари, Дарија Касаткина, Белинда Бенчиќ и финалистката од Австралија опен, Елена Рибакина која скокна 15 позиции и прв пат во кариерата влезе помеѓу најдобрите 10 тенисерки на светот.
