Одложено е за денеска закажаното рочиште на кое како обвинети за организација на 27-мо априлските насилства во Собранието, исказ требаше да дадат Спиро Ристовски, Миле Јанакиески и поранешниот директор на УБК Владимир Атанасовски. Двајцата судии во советот (Иле Трпков и Дијана Груевска Илиевска) се потврдени како заболени од корона вирусот.
Наредните две недели нема да има рочишта поради изолацијата на членовите на судскиот совет, соопшти кривичниот суд. Исто така судот извести дека сите судења на овие двајца судии во наредните 14 дена се одложуваат.
Последното рочиште беше пред 6 дена, минатиот четврток кога исказ даде поранешниот претседател на Собранието Трајко Вељановски. Рочиштето беше прекинато по барање на обвинителката Вилма Русковска, која нагласи дека била уморна поради реализација на акцијата Планина во Грчец и неколку населби во Скопје.