Откако ги изнесоа сите куфери од патничкиот авион, последни на ред дојдоа и вакцините. Тие сепак највнимателно третирани. Фрижидерот исполнет со три илјади дози не повеќе од две минути стоеше надвор на отворено пред да смени локација – од леталото, во возилото на Трансфузиологија. Рутата продолжува од скопскиот аеродром и завршува во поликлиниката „Јане Сандански“. Таму вакцините ќе бидат сместени во фрижидери со температура од -18 до -20 степени Целзиусови. Ова е само мал дел од целата договорена количина со Русија, за набавка на 200 илјади дози од вакцината „Спутник“.
Изминативе денови, во овие моменти, а и во следните денови ќе ја продолжиме интензивната комуникација со цел да разговараме и да се организира и динамиката на доаѓање на следните количини. Вкупно нарачани се 200 илјади дози, станува збор за вакцини коишто се различни во делот на вакцинацијата и ревакцинација, што значи дека сите овие три илјади дози ќе се користат за прва вакцина. Продолжува процесот на имунизација во делот на здравствените работници и според индикацијата и на граѓани онака како што е тоа предвидено во Националниот план за имунизација, рече министерот Филипче.
Добро е познато дека Спутник-В е првата регистрирана вакцина против Ковид-19 во светот, базирана на платформа на човечкиот аденовирусен вектор. Вакцината е апсолутно безбедна и ефикасна и сега со право станува светски бестселер, изјави Сергеј Баздникин – Амбасадор на Руската Федерација.
За три недели во Македонија се очекува да пристигне и пратката со дози наменети за ревакцинација на оние коишто ќе ја примат првата доза. Таа течност има различна структура од првичната доза и поради тоа овие три илјади дози се наменети за точно три илјади луѓе – наместо да се тргнуваат две дози настрана за секој еден вакциниран, како што се прави со вакцините „Фајзер“. Вакцинацијата со руските вакцини треба да започне во среда, а освен медицинскиот кадар, ќе започне и имунизацијата на приоритетните групи согласно Националниот план за вакцинација – луѓето во домовите за стари лица, а потоа и останатите коишто се на ред.
Во следниот период се очекуваат периодично да пристигнуваат по неколку илјади дози и се така додека да се стигне до бројката од 200 илјади испорачани дози од руската вакцина „Спутник“ колку што здравствените власти нарачаа, а вклучително и со останатите дози коишто ги очекуваме од другите производители – треба да се обезбедат два милиони и двесте илјади вакцини за Македонија.
Петар Догов