Владата го именуваше Исамедин Азизи за член во македонско-бугарската комисија за историски прашања. Одлуката е донесена на денешната владина седница, и како што дознава Телма, комисијата не била информирана за ова.
Од владата велат дека Азизи доаѓа на местото на Александар Литовски, од Институтот за национална историја, кому му истекол договорот. Азизи станува член на комисијата на предлог на Министерството за надворешни.
Комисијата која е формирана според договорот за добрососедство со Бугарија има вкупно 14 члена, по седум од двете земји, и бројот на членовите не може да се менува.
Азизи е доцент, научен соработник во Институтот за национална историја во Скопје. Дипломирал историја на Филозофскиот факултет во Скопје, а магистрирал и докторирал на Институтот за национална историја на теми поврзни со Албанците на Балканот. Област на истражување му е историјата на Балканот во 20-от век.
