По скоро половина година пауза, ракометарите на Вардар се враќаат на меѓународната сцена и со дуелот против Нексе ќе се обидат по деветти пат да бидат дел од завршниот турнир во СЕХА лигата.
“Црвено-црните” во реванш дуелот против хрватскиот претставник влегуваат со предност од еден погодок обезбедена на првиот меч што се одигра уште на почетокот од март.
Вардар со видно изменет состав и неколку нови познати имиња ќе се обиде повторно да биде дел од завршницата во регионалното натпреварување и да ја одбрани титулата освоена минатата година.
Во составот на Вардар во првиот официјален настап по прекинот на сезоната ќе дебитираат голманот Роберт Кантрагрел, српскиот интернационалец Марко Вујин, засилувањата од Хрватска Анте Гаџа, Јосип Векиќ и Ловро Јотиќ кој претходно настапуваше за Еурофарм Пелистер, а тука се и македонските репрезентативци Филип Талески, Гоце Георгиевски и Томислав Јагуриновски.
Тренерот Стевче Алушовски на располагање ќе ги има сите играчи освен капитенот Стојанче Стоилов кој поради позитивниот тест на Ковид 19 е во изолација.
Мечот се игра во Скопје почнува од 20 часот и 15 минути. Пласман на завршниот турнир што ќе се одржи во Задар веќе обезбедија Загреб, Веспрем и Мешков Брест.