Младиот фудбалер на Работнички, Давид Тошевски го направи најскапиот трансфер во историјата на македонската Прва лига откако потпиша за рускиот тим Ростов.
Тошевски блесна во дресот на „дебармаалци“ сезонава и брзо ги воодушеви странските скаути. Иако имаше понуди од многу европски клубови, голгетерот кој има само 18 години реши да ја прифати понудата на амбициозниот руски тим Ростов, кој редовно се натпреварува во европските купови.
Документацијата е веќе завршена, а Тошевски потпишал петгодишен договор вреден два милиони евра, додека неговиот матичен клуб Работнички ќе инкасира еден милион евра обештетување. Ова официјално е најскапиот трансфер во историјата на македонската Прва лига, бидејќи претходниот рекорд го држеше Иван Тричковски, кој за 750.000 евра од Работнички премина во Црвена Звезда во 2008 година.
Тошевски сезонава за „романтичарите“ одигра 21 натпревар во Првата лига, постигна пет погодоци и имаше три асистенции. Деновиве се очекува тој да замине за Русија со приватен авион обезбеден од Ростов за да ја има официјалната промоција во новиот клуб.