Лос Анџелес лејкерс за рестартот на сезоната во НБА-лигата се засилија со нов кошаркар во името на Џеј Ар Смит (34).
По неколку денови шпекулации, ветеранот денеска официјално потпишал договор до крајот на сезоната со лидерот на Западната конференција и повторно ќе ја дели соблекувалната со Леброн Џејмс.
Тој беше дел од Кливленд четири сезони и освои шампионска титула во 2016 година. Смит во Лејкерс доаѓа како слободен агент, откако сезонава немаше тим. Ќе го замени Ејвери Бредли, кој се откажа од играње поради коронавирусот.
Смит лани беше отпуштен од Кавалирс, а последниот официјален натпревар го одигра во ноември 2018 година. Понекогаш проблематичниот бек-шутер во кариерата досега ги носеше дресовите на Њу Орлеанс, кој го драфтуваше во 2004 година, од 2006 до 2011 беше дел од Денвер, потоа три сезони играше за Њујорк пред да премине во Кливленд.
Во 2013 година беше прогласен за најдобар шести играч во НБА-лигата.