Во соопштението што го објави Ла Лига, Лионел Меси нема да може да ја смени средината без идниот клуб да ја плати откупната клаузула во договорот со Барселона која изнесува 700 милиони евра.
Според Ла Лига, Меси можел да ја активира клаузулата според која е слободен играч до 26 јуни, а доколку во следниот период Аргентинецот сака да си замине потребно е да се плати наведената сума која стои во договорот.
На крајот од толкувањето за статусот на Меси стои дека ѕвездата на Барселона може да замине во друг клуб доколку двете страни спогодбено се договорат за прекин на соработката.
Инаку Меси денеска не се појави на закажаното тестирање на Ковид 19 со кое почнуваат подготовките за новата сезона и со тоа Аргентинецот уште еднаш испрати порака до клубот дека не сака да ја продолжи кариерата во Барселона.
Од друга страна клубот потенцираше дека нема да преговара за раскин на договорот туку претседателот Жозеп Марија Бартомеу ќе закаже состанок со Меси на кој ќе разговараат за продолжување на уште една година.