Само две години пред да го преземат богатите катарски сопственици клубот од француската престолнина, Лајпциг потпомогнат од компанијата Ред Бул го почна својот пат низ пониските лиги во Германија, а само 11 години по формирањето веќе го слави најголемиот успех во кусата историја на постоење.
Лајпциг заедно со Лион се двете сензации во завршницата од Лигата на шампионите. По елиминацијата на Тотенхем и мадридски Атлетико на патот кон првото финале во европските натпреварувања Лајпциг ќе се соочи со Пари Сен Жермен.
Иако противникот го има фаворитскиот статус, Лајпциг нема лесно да се предаде и во клубот веруваат дека на 23 август ќе се игра германско финале. Јулијан Нагелсман не може да смета на дефанзивецот Ибрахима Конате, кој за да ја санира повредата на колкот мораше да замине на операција.
Францускиот тим по втор пат во елиминациската фаза се среќава со тимови од Германија. Пред 11 години, Пари Сен Жермен во шеснаесетина финалето од Купот на УЕФА го елиминираше Волфсбург, а вкупно во историјата одиграл 11 натпревари и забележал шест победи, два нерешени резултати и три порази.
На спротивната страна Лајпциг до сега одиграл шест меча со противници од Франција и има учинок од по две победи, два нерешени резултати и два порази