Луис Хамилтон триумфираше на трката од формула 1 шампионатот што се возеше на патеката во Силверстон. Актуелниот светски првак и покрај проблемите во последниот круг на крајот успеа прв да мине низ целта.
За Хамилтон ова беше седма победа на домашната патека. Британецот ја искористи предноста на пол позицијата и изби на првото место, а во последниот круг имаше проблем со предната лева гума, но и тоа не беше пречка да го освои првото место.
Неговиот тимски колега Валтери Ботас долго време возеше зад Хамилтон, но и тој имаше проблем го гумите и на крајот заврши на 11-тата позиција. Втор низ целта мина Макс Фестапен, а третото место му припадна на Шарл Леклерк.
По денешниот триумф Хамилтон води во генералниот пласман со 88 бода, триесет повеќе од Ботас додека трет со 52 е Ферстапен.
Во конкуренција на конструктори на чело е Мерцедес со 121 бод пред Ред Бул со 55 и МекЛарен со 41.
Следниот викенд ќе се вози четвртата трка од новата сезона и поворно возачите за бодови ќе се борат на патеката во Силверстон.