Сите 17 бугарски европратеници испратија писмо до членови на Европскиот парламент, како и до водечките европски медиуми, а поврзано со палењето на двата автомобили пред Амбасадата на Бугарија во Скопје.
Во писмото го осудуваат инцидентот што за нив е подмолен напад и го опишуваат како „намерен чин на агресија, несомнено мотивиран од омраза, кој ги загрози животите и безбедноста на вработените во амбасадата на земја-членка на Европската Унија и нивните семејства“.
Настанот според нив е „поттикнат од постојана антибугарска реторика и систематска нормализација на говорот на омраза против Бугарите и Бугарија во медиумите и јавниот дискурс, вклучително и од претставници на властите“.
„Земјата, која се стреми кон членство во Европската Унија, мора безусловно да ја гарантира безбедноста на дипломатските мисии, да се спротивстави на јазикот на омраза и да демонстрира почит кон своите соседи не само со зборови, туку и со дела“, пишуваат во писмото.
Во однос на брзата реакцијата на македонските власти за притворање на осомничениот велат дека е за пофалба и ја поздравуваат осудата на чинот од страна на министерот за надворешни работи, Тимчо Муцунски.
„И покрај ова, ги повикуваме Македонското собрание, претседателот и премиерот недвосмислено да го осудат овој чин на омраза, кој претставува сериозно кршење на Виенската конвенција“напишаа бугарските европратеници.