Рускиот претседател Владимир Путин разговараше по телефон со својот американски колега Доналд Трамп и му го честиташе 80-тиот роденден, соопшти Кремљ.
Путин испрати и телеграма до Трамп, изразувајќи уверување дека заедно со својот американски колега може да ги обнови односите меѓу Русија и САД и да придонесе за глобалната безбедност.
Путин му се обрати на Трамп со „драг Доналд“ и го нарече американскиот претседател „брилијантен и извонреден политичар“.
Трамп беше трогнат од честитките на Путин, му се заблагодари и рече дека рускиот претседател е првиот странски лидер што му се јавил денес, според помошникот на претседателот Јуриј Ушаков.
„Разговорот беше пријателски и искрен и траеше околу еден час. Ако сакате точно време, беше точно 55 минути“, рече тој.
Путин, исто така, ѝ ги изрази своите најдобри желби на првата дама на САД Меланија Трамп и ја пофали нејзината улога во повторното обединување на руските и украинските деца со нивните семејства, додаде Ушаков.
За време на разговорот, Трамп на шега забележа дека не му се допаѓа бројот 80.
- „Би рекол дека разговорот не беше без малку хумор. Дури ќе ви откријам и една тајна: Доналд Трамп баш не го сака бројот 80, бидејќи е полн со енергија и виталност“, рече претставникот на Кремљ.
Тој додаде дека Путин не му испратил никакви подароци на Трамп за неговиот роденден. Рускиот лидер му посака на својот колега успешно Светско првенство, кое САД го организираат заедно.
Во разговорот со Путин, американскиот претседател ја изрази својата подготвеност да соработува со Украина и европските земји за постигнување мирно решение.
Путин, пак, му потврди на Трамп дека ако Володимир Зеленски сака средба, тој е добредојден во Москва, додаде Кремљ.