Македонската кошаркарска репрезентација утре почнува со подготовки за претквалификациите за Европското првенство во 2029 година. Неуспехот во претквалификациите за Светското првенство што се играат изминатото лето, ја турнаа нашата репрезентација меѓу најслабите европски селекции. Сега треба да започне патот кон враќање на старите патеки.
Селекторот Марјан Илиевски утре во 12 часот во еден од скопските хотели ќе ја направи прозивката, а потоа од 18:30 часот во салата „Кале“ ќе го одработи првиот тренинг со неговите 15 избраници.
Во овие мини подготовки ќе нема премногу време за воигрување или тренинзи, бидејќи веќе во четврток од 19 часот, Македонија го пречекува Азербејџан во „Кале“ во рамки на првото коло од групата А. Само три дена подоцна или во недела ќе гостуваме кај Република Ирска, а во нашата конкуренција е уште и селекцијата на Луксембург, но со овој ривал ќе се соочиме во февруарскиот репрезентативен прозорец.
Нашата репрезентација треба да заврши на првото место во групата за да се пласира во втората фаза од квалификациите за Евробаскетот во 2029 година, а понатаму ќе оди и најдобрата второпласирана селекција од трите групи.
ФОТО: Кошаркарска федерација на Македонија/мкд.баскетбалл
