Новиот скопски градоначалник со цвеќе дојде по градоначалничката фотелја. Букет, насмевка и нов почеток. Орце Ѓорѓиевски и Данела Арсовска денеска ја остварија протоколарната средба за примопредавање на функцијата. Поминаа помалку од еден час внатре во кабинетот, а потоа ниту новиот градоначалник, ниту пак поранешната градоначалничка не споделија детали од разговорот. По средбата, Арсовска влезе во возилото и си замина.
Ѓорѓиевски дојде пред камерите да ги најави првите активности. Вечерва е акцијата за „генералка“ на Скопје. Но, прво нешто што направи новоизбраниот градоначалник е отстранување на рампите пред влезот на градските канцеларии.
Ѓорѓиевски најавува „чистка“ и во буквална смисла расчистување на околината од отпад, но „чистка“ и во јавните претпријатија. Ќе има ревизија во Град Скопје, а потоа ќе се поднесуваат и кривични пријави, тврди Орце Ѓорѓиевски.
Вечерва почнуваат да течат 72 часа за расчистување на градот. Ѓорѓиевски информира дека се обезбедува дополнителната механизација за „Комунална хигиена“.
„Во понеделникот имаше 16 исправни возила од „Комунална хигиена“. Мислам дека до вечерва ќе успееме да имаме околу 40 возила на располагање. Дополнително ќе помогнат и колегите градоначалници од внатрешноста, како што тоа беше случај во изминатиот период. Ќе бидат вклучени и цистерни за перење на улиците, после долго време ќе ги переме и улиците во главниот град. Плоштадот ќе се пере вечерва, од денеска почнуваме. Кејот сериозно ќе се чисти, но и ќе се пере кејот. Така што, дел по дел ќе ги ревитализираме јавните претпријатија, да ги доведеме во нормала“, порача Орце Ѓорѓиевски, градоначалник на Град Скопје.
Ѓорѓиевски најави интервентни мерки и во насока на стабилизација на јавниот градски превоз – најпрво краткорочни решенија, па потоа и долгорочни. На градските улици се враќаат 60 автобуси, со цел да не дојде до прекин на јавниот транспорт.
Петар Догов