Ракометната федерација на Македонија денеска испати премии во висина од 5 милиони денари за три репрезентации кои обезбедија пласман, односно играа на големите меѓународни натпреварувања.
Машката сениорска ракометна репрезентација ја доби ветената премија од 2 милиони денари за пласманот на Светското првенство 2025 година што ќе се одржи во јануари во Хрватска, Норвешка и Данска. Ракометарите во мајскиот бараж ја елиминираа селекцијата на Фарски Острови на патот до Мундијалот.
Идентична парична награда од 2 милиони денари ќе добијат и ракометарките, кои обезбедија пласман на претстојното Европско првенство 2024 година што ќе се одржи во Унгарија, Швајцарија и Австрија. Женскиот национален тим во квалификациската група заврши на второто место, а на континенталниот турнир ќе се соочат со селекциите на Унгарија, Турција и Шведска.
Премија од 1милион денари добија и машката репрезентација до 20 години, која изминатото лето го освои 9.место на Европското првенство што се одржа во Словенија. Со овој успех, младите ракометари идното лето ќе играат и на Светското првенство до 21 година што ќе се одржи во Полска.
Фото: Игор Паневски