Вкупно осум години затвор доби поранешниот генерален секретар на владата, Драги Рашковски за случајот „Софтвери“. За делото злоупотреба на службената положба е осуден на седум години затвор, а за делото перење пари, една година и шест месеци затвор. Во казната му се засметува и времето поминато во притвор. Судијката ги прогласи за виновни и професорот Ивица Димитровски, носител на проекти на „ФИНКИ“, кој доби 5 години затвор, а надворешниот соработник на владата, Игор Христов, е казнет со пет ипол години затвор. Даниел Станчев од „Инвока груп“, доби 4 години во затвор, а Ирена Ивановска, Игор Ивановски и Маја Силјаноска, надворешни соработници на владата по три години. Осудените треба да ја надоместат и штетата направена кон државата.
Сите се обвинети за злоупотреби при набавка на два софтвера и исплата на хонорари. Првиот софтвер е за сообраќајни прекршоци и биометриска идентификација, кои никој не ги користел, а Генералниот секретаријат со кој управуваше Рашковски ги набавил иако немал надлежност за тоа. Дополнително, тендерите или биле наместени или немало тендер, а била фаворизирана фирмата „Инвока груп“.
Вториот дел од обвинението е за хонорарите. Рашковски склучувал авторски договори со физички лица што не ги извршувале работните обврски. Според обвинението, тие подигнувале дел од парите и му ги враќале нему.
Судот констатираше и дека Рашковски имал доминантна позиција во текот на главната расправа, како и додека бил генерален секретар кога давал насоки за остварување на негов личен интерес.
Во текот на судењето, Димитровски покажал искрено каење и дистанцирање од Рашковски, Христов имал партнерски однос со него, Станчев лојален однос, а Сиљановска и Ивановска меѓусебно почитување.
Изрекувањето на пресудите во судот го следеше и шефот на обвинителството за гонење организиран криминал и корупција, Ислам Абази, како придружба на обвинителката Ивана Трајчева, која го застапува обвинението.
Далиборка Демјанска Цветановска