Обвинителката Ленче Ристоска останува без „Талир“. Ова следува по одлуката на државниот обвинител Ненад Савески да ги повлече овластувањата што неговите претходници им ги давале на дел од обвинителите за да можат да работат на предмети од други обвинителства.
Обвинителите од поранешното СЈО, по враќање во матичните обвинителства, со овластувања продолжија да ги работат истите предмети со овластување од државниот обивнител. Ристоска со овластување ги води двата предмета „Талир“ за седиштето на ВМРО-ДПМНЕ и за финансирање на партијата.
Савески на брифингот со новинарите тврдеше дека овој негов потег не е поврзан лично со Ристоска и дека нема политичка позадина, туку во насока да се воведе ред и евиденција. Партијата ВМРО-ДПМНЕ е засегната во предметите „Талир“, а одбраната бараше Ристоска да не биде обвинител.
„Одлуката ја донесов денеска и сè уште не е потпшишана. Ова не е само за Ленче Ристоска. Има многу овластувања, не знам колку се точно. Имаме шеф на обвинителство во Гостивар што постапува по предмет на ОЈО ГОКК. Мораме да имаме јасна слика. Моите одлуки не се политички“, вели државниот обвинител Ненад Савески.
Исклучок Савески ќе направи за обвинителствата во Ресен и во Крива Паланка кои се без обвинители и за големиот предмет за Кочани што се суди во Идризово, а кој го застапуваат 15 обвинители поради сложеноста на предметот и многу докази.
Обвинителката Ивана Трајчева која не доби нов мандат во обвинителството за гонење на организиран криминал нема да добие овластување за да остане на предметите за Кочани поврзани со полицајците. Савески смета дека Трајчева е извонредна обвинителка, но вели дека предметите не треба да се поврзуваат со конкретни обвинители.
„Треба да се даде простор и на други обвинители. Сакам сите да се почувствуваат дека се вреднувани. Не фаворизирам никого. Се согласувам дека на нови обвинители може ќе им биде потешко да се вклучат, но јавнообвинителската функција не е лесна“, додава Савески.
Новиот државен обвинител им одговорил и на адвокатите за предметот за пожарот во „Пулс“, кои бараа ревидирање на обвинението, дека нивната иницијатива не може да биде основ ЈО да преоцени обвинение како во фактичка состојба за тоа е потребна промена на фактичка состојба или нов доказ.
На вчерашната седница на советот гласал дека премиерот Мицкоски не ја нарушил самостојноста на обвинителката Ленче Ристоска, затоа што аргументите на комисијата биле прифатливи за него и рече дека според него обвинителите интегритетот го носат во себе и никој не може да им го земе.
Елена Ивановска Мукоска