Пелагониските млекопроизводители се револтирани бидејќи државата се уште не им ги исплатила ланските субвенции. Дел од нив добиле пари само за два или три месеци од 2025 година, додека субвенциите по грло добиток воопшто не се исплатени. Во исто време, намалена им е и откупната цена на млекото, поради што се соочуваат со сериозни финансиски проблеми.
-Субвенциите доцнат, а млекото од 36 денари за литар падна на 24 до 30 денари. Тоа е катастрофа. Јуниците треба да ги чуваме за приплод, а ние ги продаваме за месо, вели Валер Јусеновски, сточар.
-Сега најмногу ни требаат пари и за ѓубре и за садење, а пари немаме скоро за цела година. Кај некои пуштија за два месеца, кај некои за три, вели Мевљудин Ќулафовски.
Сточарот Тони Петковски, претседател на здружението „Пелагониско поле“, вели дека се чувствува изманипулиран бидејќи им верувал на ветувањата на министерот Трипуновски за исплата на субвенциите и ја поддржал програмата за 2026 година, и покрај намалените средства и новите услови, поради што бил критикуван од членството.
-Бевме на шест состаноци на кои преговаравме. Јас бев излажан. Како што бев излажан јас, така ги излажав сточарите низ целата држава, вели Тони Петковски, млекопроизводител и претседател на здружението „Пелагониско поле“.
Сточарите бараат итна исплата на субвенциите и најавуваат протести. Од Министерството за земјоделство денеска не добивме одговор, но министерот Трипуновски денвиве во изјави за медиумите најави дека по лозарите и овоштарите, млекопроизводителите се следни за исплата на субвенциите за вториот квартал од 2025 година.
Емилија Мисирлиевски
