Се следи состојбата во континуитет и онколошките пациенти нема да останат без терапија и покрај тоа што буџетот на Клиниката за радиотерапија и онкологија е ист како лани, смирува првиот човек на Фондот за здравство, Сашо Клековски.
„Ние знаеме дека од вкупно 80 лекови кои се достапни, четири се недостапни подолг период поради една или друга причина. Тоа се поевтините цитостатици за кои генерално нема интерес од дистрибутерите да ги носат во земјата. Се прават анализи и во Онкологија и во Фондот до каде е потрошувачката на лекови, од оние што се одобрени од поскапите лекови, секако ќе се реагира навремено“, изјави Сашо Клековски, директор на ФЗОМ.
Во меѓувреме е укажано на сите установи каде се третираат онколошки пациенти дека е крајно време да се обноват водичите за лекување кои не се променети од 2008 година. Во консултации е вклучен и ПЕТ центарот каде е значително зголемен бројот на снимки за соодветно да се следи употребата и ефикасноста на терапијата.
„Ќе работиме напорно да се обезбеди втор ПЕТ скен, за да стасаме до бројката од 5.500-6.000 годишно, што сметаме дека е доволен број на ПЕТ скенови за да се следи ефикасноста на употребата на терапијата кај пациентите“, додаде Клековски.
Здравствениот систем и натаму се соочува со недостиг на патолози вон Скопје. На два обновени огласи за пет патолози не се пријавил ниту еден кандидат. Сепак, и покрај ваквите ограничувања со кадарот, во 2025 година во земјава се направени над 20.000 хистопатолошки анализи.
Нина Стефанова