Американскиот претседател Доналд Трамп изјави дека „100%“ ќе ги спроведе заканите за воведување тарифи кон европските земји кои се спротивставуваат на неговото барање САД да преземат контрола врз Гренланд.
Тој најави царини од 10% за стоки од Велика Британија и уште седум НАТО-сојузници од 1 февруари, со можност тие да пораснат на 25% од 1 јуни, доколку не се постигне договор.
Европските сојузници застанаа зад суверенитетот на Гренланд, кој е дел од Кралството Данска. Данскиот министер за надворешни работи порача дека „не може со закани да се дојде до сопственост“, додека шефицата на европската дипломатија Каја Калас истакна дека ЕУ „нема интерес да започне конфликт, но ќе го брани својот став“ и дека суверенитетот „не е предмет на трговија“.
Меѓувреме, НАТО соопшти дека продолжува соработката со Данска и Гренланд за безбедноста на Арктикот, а ЕУ најави итен самит во Брисел за да се разгледа одговорот на најновите закани од Трамп.
Од Данска предупредија дека евентуална американска воена акција во Гренланд би значела крај за НАТО, додека Вашингтон тврди дека сегашните воени активности во регионот се рутински и однапред координирани.