Камиони натоварени со храна, лекови и други хуманитарни средства се движат низ централниот дел на Појасот Газа, речиси еден месец по стапувањето во сила на примирјето меѓу Израел и Хамас.
Хуманитарните организации апелираат Израел да отвори дополнителни гранични премини за да се овозможи поголем пристап на помош во палестинската територија, каде што населението сè уште се соочува со тешки услови за живот.
Според здравствените власти во Газа, повеќе од 69.000 Палестинци се убиени од почетокот на војната, која започна на 7 октомври 2023 година со нападот на Хамас врз јужен Израел, при што беа убиени околу 1.200 лица, а 251 беа земени како заложници.
Примирјето, постигнато со посредство на САД има за цел постепено да стави крај на најсмртоносниот и најразорен конфликт меѓу Израел и палестинската организација.
Меѓувреме израелската армија објави снимки за кои тврди дека прикажуваат активности на трупите „близу Жолтата линија“ во Газа – подрачје под израелска контрола според договорените линии на примирје.
Армијата соопшти дека нејзините сили претходно дејствувале во областа Кан Јунис, уништувајќи стотици позиции на милитанти, пред да се прегрупираат источно од линијата.
И покрај примирјето, хуманитарните организации предупредуваат дека најголемиот дел од населението во Газа сè уште е раселено и живее во шатори или урнатини, додека се приближува зимата.