Руски дрон утрово удри во станбена зграда во источниот украински град Днипро, при што загинаа три лица, а 12 се повредени, меѓу кои и две деца, соопштија украинските власти.
Нападот се случил додека повеќето жители спиеле. По ударот избил и пожар во дел од зградата, уништувајќи неколку станови.
Нападот во Днипро е дел од пошироката руска воздушна офанзива со дронови и ракети врз цели низ Украина, насочена кон енергетската инфраструктура.
Според украинските воздухопловни сили, Русија лансирала вкупно 458 дронови и 45 ракети, од кои 32 биле балистички, а украинската одбрана успеала да собори 406 дронови и девет ракети.
Поради оштетувањата, во неколку региони било исклучено снабдувањето со електрична енергија, изјави украинската министерка за енергетика Светлана Гринчук.
Истовремено, борбите за стратешкиот град Покровск во источна Украина се интензивираат, додека Киев и Москва се обидуваат да покажат воена предност на бојното поле.